സുഗന്ധമുള്ള സുവര്‍ണം
സുകുമാര്‍ അഴീക്കോട്
'സ്വര്‍ണത്തോട് സുഗന്ധം ചേര്‍ന്നതുപോലെ' എന്ന് പലപ്പോഴും ആളുകള്‍ ഉപയോഗിച്ചുകണ്ടിട്ടുണ്ട്. എന്നാല്‍ എനിക്ക് ഇതുവരെ അത് അനുഭവത്തില്‍ വന്നിരുന്നില്ല. ആ പ്രയോഗം ഭാഷയിലെ വെറുമൊരു അതിശയോക്തിയായിരിക്കും എന്നാണ് ഞാന്‍ ധരിച്ചിരുന്നത്.
ആ ധാരണ അപ്പാടെ മാറി. സുഗന്ധവാഹിയായ സുവര്‍ണം ഇന്ന് ഇന്ത്യക്കാണ്; അതിശയോക്തിയല്ല, അവരെ ഉണര്‍ത്തുകയും ഉയര്‍ത്തുകയും അവരുടെ ഉള്ളം കുളിര്‍പ്പിക്കുകയും ചെയ്യുന്ന യാഥാര്‍ഥ്യമാണ്. എല്ലാ രംഗങ്ങളിലും ദുര്‍ഗന്ധം മുറ്റി തഴച്ചു വര്‍ധിക്കുന്ന ഒരു ദശാസന്ധിയിലാണ് ഈ പരിമളം ചൈനയില്‍നിന്ന് വീശിവന്ന കാറ്റില്‍ നമ്മുടെ മനസ്സുകളില്‍ നിറഞ്ഞുകവിയുന്നത്. ഇന്ത്യയുടെ രാഷ്ട്രീയജീവിതത്തിന്റെ അടിസ്ഥാനമായ ജനാധിപത്യത്തിന്റെ കളിക്കളമായ ലോക്സഭയില്‍ ജനപ്രതിനിധികള്‍ കള്ളക്കച്ചവടം നടത്തി നാടിനെ അപമാനക്കടലില്‍ ആഴ്ത്തിയ ഒരു ഘട്ടത്തില്‍ ഈ സൌഗന്ധികസുവര്‍ണം നമുക്ക് നല്‍കിയ നിയതിയുടെ നീതിബോധം ചരിത്രത്തിന്റെ പുഞ്ചിരിയായി തെളിയുന്നു.
ബീജിങ്ങില്‍ ലോക കായികാഭ്യാസങ്ങള്‍ അരങ്ങേറി മൂന്നാംനാളായപ്പോള്‍ ഒളിമ്പിക്സിന്റെ ഫലപ്പട്ടികയില്‍ ഇന്ത്യയ്ക്ക് 'പൂജ്യത്തിന്റെ കളം' പ്രവചിച്ച വിദഗ്ധന്മാരെ തിരുത്തിയും നിരാശയില്‍ മുങ്ങിയ ഒരു ജനതയെ ഉണര്‍ത്തിയും ആ സ്വര്‍ണം പറന്നുവന്നു. ആ തിങ്കളില്‍ നട്ടുച്ചയ്ക്ക് ഇന്ത്യയുടെ മുകളില്‍ ഒരു 'അഭിനവ'സൂര്യന്‍ ഉദിച്ചുയര്‍ന്നു. വെടിപൊട്ടിച്ച് ലോകത്തെ മുഴുവന്‍ തന്റെ നാടിന്റെ നേട്ടത്തെ അറിയിച്ചുകൊണ്ടാണ് പഞ്ചാബുകാരനായ ബിന്ദ്ര സുവര്‍ണഹാരം ഇന്ത്യയുടെ ഒഴിഞ്ഞ കഴുത്തില്‍ അണിയിച്ചത്.
ഹോക്കിയുടെ സ്വര്‍ണപ്പതക്കം ഇനി കിട്ടാത്തവിധത്തില്‍ നിലച്ചുപോയ വര്‍ഷത്തിനടുത്തകാലത്താണ് ഈ യുവാവ് പിറന്നുവീണത് എന്ന് നാം ഓര്‍ക്കണം. ഇന്ത്യയുടെ അക്കാലത്തെ മോഹഭംഗം മുഴുവന്‍ ഈ കുഞ്ഞ് അമ്മയുടെ ഗര്‍ഭപാത്രത്തില്‍വച്ചുതന്നെ ഉള്‍ക്കൊണ്ടതുപോലെ തോന്നുന്നു. കൈക്ക് കരുത്തും മനസ്സിന് ഉറപ്പും വന്നപ്പോള്‍ തന്റെ മനസ്സിലെ വിഷാദത്തെ രാഷ്ട്രത്തിന്റെ ആഹ്ളാദമാക്കി മാറ്റി ആ യുവാവ്.
ഈ ആഹ്ളാദവും അഭിമാനവും ഇവിടത്തെ കായികമേധാവികളുടെ ജഡനിരകളില്‍ ഊഷ്മളരക്തം ഒഴുക്കാനും അവ യുവ ജനങ്ങളില്‍ ലോകജേതാക്കളുടെ വീര്യം പകരാനും കഴിവുറ്റ മായാത്ത ഒരു പ്രചോദനകേന്ദ്രമായിത്തീരട്ടെ എന്നാശംസിക്കുന്നു. ഈ ഒളിമ്പിക്സ് അവസാനിക്കുന്നതിനുമുമ്പുതന്നെ ഈ മഹാപ്രചോദനത്തിന്റെ ഗുണഫലങ്ങള്‍ ഇന്ത്യയ്ക്ക് അനുഭവപ്പെടട്ടെ എന്ന് പ്രാര്‍ഥിക്കുകയും ചെയ്യുന്നു.
കടപ്പാട് ദേശാഭിമാനി ദിനപത്രം
No comments:
Post a Comment
അക്ഷരങ്ങളെ സ്നേഹിക്കുന്നവര്‍ക്കും സ്വാഗതം
ദയവായ് നിങളൂടെ അഭിപ്പ്രായം എഴുതി അറിയിക്കുക.